عمرانیات » ابا جان عرف سر جی

ابا جان عرف سر جی

بدھ, 26 جنوری 2011, 23:59 | زمرہ: طنز و مزاح
ٹیگز:

ابا جان بڑے سخت ہیں۔۔۔ اور پھربڑے کٹر معلم یعنی استاد بھی ہیں۔۔۔

سکول میں جب ان کا پیریڈ ہماری کلاس میں لگنے کا کوئی چانس ہوتا تھا تو منتیں ماننے والوں میں سب سے پہلے میں ہوتا تھا کہ اللہ میاں سر جی کا پیریڈ ہماری کلاس میں نا لگوانا۔۔۔ پورے دس نفل پڑھوں گا۔۔۔

یہ سن عیسوی 1993 کا زکر ہے  ابا جان یعنی سر جی ہمیں میتھ میٹکس پڑھاتے تھے۔۔۔ اب میرے جیسا نکما بچہ جو حساب کتاب اور پھر سر جی کے پڑھانے کے انداز سے زہنی مطابقت ہی نہیں رکھتا تھا، ڈرتا گھبراتا سر جی کی ہاں جی ہاں جی میں سر دائیں سے بائیں گھوماتا رہتا تھا کہ جیسے سب سمجھ آ رہا ہے جی۔۔۔ وہ الگ بات ہے کہ جب سر جی کلاس میں ٹیسٹ لیتے اور میں اعلی اور امتیازی نمبروں سے فیل ہوتا تو جہاں فیل یافتہ طلباء کو دو دو ڈنڈے ہاتھوں پر پڑتے تھے، مجھے ان گنت ڈنڈوں کا سواد ملتا تھا اور اب یہ بتانا مناسب نہیں سمجھتا کہ کہاں کہاں ملتا۔۔۔ بس کچھ محسوس ہی نہیں ہوتا تھا کہ کہیں بیٹھا ہوں یا نہیں۔۔۔

ابا جان بہت نفیس آدمی ہیں۔۔۔ سکول کے تقریبا سارے طلبا ان کے مداح تھے۔۔۔ لیکن میں ہی ایک ایسا جانباز تھا جس نے ان کے “مجھ” پر تشدد کے خلاف بغاوت کا علم اٹھایا اور بھر پور سیاسی انداز میں امی جان سے پرنسپل کو فون کروا دیا۔۔۔ کہ جی “ میں سر جی کی بیگم نہیں بلکہ ان کے ایک شاگرد کی والدہ کے طور پر بات کر رہی ہوں۔۔۔ سر جی نے میرے معصوم بچے پر پھر سے قہر نازل کیا ہے اور معصوم بچہ دن رات  درد سے کراہتا رہتا ہے۔۔۔ آپ سر جی کو پابند کریں کہ جتنی سزا باقی بچوں کو ملتی ہے اتنی ہے میرے معصوم بچے کو دیا کریں۔۔۔ نا کم نا زیادہ”۔۔۔ پرنسپل صاحب نے امی جان کو یقین دہانی کروائی کہ سر جی کو قانون کی پاسداری پر پابند کر دیں گے۔۔۔ میں اپنی اس کامیابی پر پھولے نہیں سما رہا تھا۔۔۔ آج پہلی دفعہ محسوس ہوا کہ آج سر جی میرا بال بھی بیکا نہیں کر سکیں گے۔۔۔ خیر۔۔۔ سر جی کا ٹیسٹ اور پھر سزا کا مرحلہ بڑی آسانی سے گزر گیا اور امی کی سفارش رنگ لائی۔۔۔ میں حسب معمول فیل ہو گیا لیکن خلاف توقع مجھے وہ دو ڈنڈے بھی نہیں پڑے ۔۔۔ میں حیران تھا کہ سر جی کے دل میں اتنی پدرانہ شفقت کیسے امڈ آئئ۔۔۔

لیکن پھر اچانک دل میں  ایک ہوک سی اٹھی۔۔۔ چھٹی حس مشکل وقت کے آمد آمد کی نوید سنا رہی تھی۔۔۔ لیکن یہ مشکل وقت ہو گا کیا کیسا۔۔۔ سر جی کی مار سے تو چھٹکارا مل گیا تھا۔۔۔ اب اس سے زیادہ مشکل وقت اور کیسا ہو سکتا ہے۔۔۔

تھکا ہارا سکول سے گھر پہنچا۔۔۔ اور امی کی مدد کے لیے ان کا شکریہ ادا کیا۔۔۔ اماں خاموش کھڑی دروازے کو تک رہی تھیں۔۔۔ ابا جی بھی سکول سے تشریف لا چکے تھے۔۔۔  نہایت شفقت سے مجھے مخاطب ہوئے۔۔۔ کہ “بیٹا، ہر بار کلاس ٹیسٹ میں فیل ہوتے ہو۔۔۔ میری ناک کیوں کٹواتے ہو۔۔۔ آج سے شام کو تم مجھ سے پڑھا کرو گے۔۔۔” میں نے مجبورا اثبات میں سر ہلا دیا۔۔۔ لیکن ان کی بات ابھی ختم نہیں ہوئی تھی۔۔۔ کہنے لگے۔۔۔ “سکول میں تو تمہاری والدہ کی سفارش نے تمہیں بچا لیا۔۔۔ لیکن گھر میں تو کوئی پرنسپل صاحب نہیں ہیں۔۔۔”

اب آپ سمجھ سکتے ہیں کہ سواد مجھے اس دن بھی ملا۔۔۔ بلکہ پہلے سے کہیں زیادہ جگہوں پر ملا۔۔۔

نوٹ: مجھے خراج تحسین پیش کرنے کے لیے بہت عرصے بعد ایک ہندی فلم “تارے زمن پر” بھی بنا ئی گئی ہے۔۔۔



5 تبصرے برائے “ابا جان عرف سر جی”

  1. 1جعفر

    ہمارا ایک کلاس فیلو تھا، ماشاءاللہ آپ سے بھی زیادہ ‘ذہین’
    اس کے ابا ہمیں انگلش پڑھاتے تھے
    سب کو اگر دو ڈنڈے پڑتے تھے
    تو اس غریب کو چھ۔۔

  2. 2hijabeshab

    🙂 🙂 🙂

  3. 3جاوید گوندل ۔ بآرسیلونا ، اسپین

    ذاتی طور پہ تعلیم یا کسی بھی طور کسی کام میں کسی کو کچھ سکھانے کے لئیے مارپیٹ یا ذہنی در خوف اور تشدد کا قائل نہیں۔ کہ اس سے ذہن کند ہو جاتے ہیں۔

    مگر ایک بات میں شک نہیں کیا جاسکتا کہ آپ کے ابا جان اپنے حاسب میں آپ کی بہتری کے لئیے کوشش کرتے تھے۔ ورنہ انہیں کیا پڑی تھی کہ آپ پہ اسقدر “محنت” کرتے۔

  4. 4imranbhai

    ماشا الله ، بہت خوب ….
    اس میں تو کوئی شک نہیں کہ سر جی نہ صرف بہت اچھے معلم بلکہ اتنے ہی اچھے والد بھی ہیں. آپ کے ساتھ ان کا سلوک تو “آپ کی حرکتوں” کی وجہ سے تھا. ورنہ اس دنیا میں بہت سے ایسے لوگ(با شمول ہمارے) موجود ہیں جن کے ساتھ “سر جی ” کا سلوک نہایت مشفقانہ اور پیار سے بھرپور ہے.

ٹریک بیکس

  1. 1. جعفر
  2. 2. hijabeshab
  3. 3. جاوید گوندل ۔ بآرسیلونا ، اسپین
  4. 4. ابا جان عرف سر جی | Tea Break
  5. 5. imranbhai

تبصرہ کیجیے

 
error: خدا کا خوف کھاو بھائی، کیا کرنا ہے کاپی کر کے۔۔۔